Tentang Saya

Assalamu'alaikum agam ngon inong
tuha ngon muda para pembaca
lon lake meuah nyoe tan meukenong
syair lon karang ke rakan dumna

lon ujo tuleh ngon jaro limong
haba udep lon ubena yang ka
dari manyak cut di bineh gunong
trok jino tamong u Kota Banda

Wate ubit lon tinggai di Trumon

Gamong Ladang Rimba ngon ayah poma

di sideh keuh phon sikula lon tamong

leuh thon kue limong udep di donya

Seudeh tat hate kamo hai bungong

thon lapan tujoh poma geu bungka

guewo bak Allah Ilahi Rabbon

Wate umu lon mantong belia

Bak 1991 hitungan lam thon

tamat di ulon sekolah pemula

MTsS Kuta Fajar sikula lon sambong

Jak meruno bak jeut ilme agama

Thon 1994 ulon lanjut beut

keudeh bak MAN sa di Kutaraja

Lhe thon di sinan dilon mekaluet

Mereuno keubit dum ileume donya

Lanjut sikula u Ar-Raniry

di Darussalam di kota Banda

thon 2002 kaleuh S.PdI

lhe buleun leuhnyan lon cok S2

Sikula pasca di Ar-Raniry

Filsafat Islam lon ci bie makna

cara seumike lon pelajari

dari 'an Nabi sampo barosa

wate tsunami peuhanco banda

di ulon tuan Po bri sulamat

teumee lon jak plueng lon keubah jiwa

Nyan keuh peulajaran supaya ta’at

na lon kereuja bak ureung Inggreh

lon bantu wareh bandum ceudara

di kota Teunom lon tinggai sideh

Lon tulong peugleh hate yang luka

bak 2006 lon wo u Darussalam

karna dipadan peuruno mahasiswa

walou lon tupeu ileume dilon tan

tapi nyan taulan buet tat mulia

Meunan keu jino wahe e rakan

Bak IAIN ulon kereuja

di Ushuluddin lon duek jurusan

Aqidah Filsafat meunan boh nama

tanggal 16 nibak buleun sa
thon 2009 meunan ceurita
di ulon tuan katroh bak masa
lon meukeluarga peulengkap agama

Thon 2010  lon jak u Jogja

lon cok S3 di kampus UIN
Studi Islam lon bot calitra
lon coba kaji ubena dalil

Goh habeh program bak UIN SUKA
kana tawaran yang  laen teuma
na beasiswa u Italia
di kota Milan Universitas Bicocca

nyankeh cerita tentang lon tuan

keubandum rakan loen buka hate

bandum gutanyo nyo hamba Tuhan

saleng keunalan bek tameupake